Friday, December 29, 2006

Tuo Ka Ba Og Palihi?

LIHILIHI

SA BAG-ONG TUIG

GISAGOP SA KATAWHAN

RENATO S. PONO SR.

KALIWAT(DESYEMBRE,2003)

(excerpts)


Ania ang imong andamon:

  1. 24 kabuok sensilyong bayente sinko-- nagkahologan kini ug kalamposan ug kabulahanan

  2. grapes o ubas-- nagkahulogan kinig katam-is ug kamaangayon

  3. pansit—nagkahulogan nga taas nilang kinabuhi

  4. 12 kabuok linapwang itlog—nagkahulogan sa maayonh panglawas

  5. puti nga panapton ug puti nga palanggana nga lusa—nagkahulogan ug kalinaw

  6. buongon—nagkahulogan nga permanenting puno


Ang prutas timaan sa kaabunda apan dili maayo ang tagokon sama sa kaymito, nangka, tsikos, kapayas, ug uban pa.


Ang pag-andam

  1. Ibutang ang mga sensilyo sa lata o bisan unsa nga sudlanan nga makahatag og kabanha;

  2. Ang buongon(mahimo nga usa, duha o tulo ba kabuok) kanang tam-ison isulod sa net bag ug ibitay kini ibabaw sa pultahan(anha sa sulod) aron ang tanan moagi—mosulod sa balay makasuong niini;

  3. Andamon daan ang lamesa sa kan-anan para sa tibuok pamilya;

  4. Ang puti nga panapton, ihapin sa lusa nga palngganang puti nga maoy sudlan sa mga prutas;

  5. Ibutang daan sa mga plato ang usa ka ubas usa ka itlog ug diyotayng pansit igo nga mahurot kan-on.


Inighagtok gayod sa alas dose sa tungang gabii, uyog-uyogon ang lata sa mga sinsilyo adto sa gawas sa balay pagahimoa. Unya mag-ampo: "Doblehon mo kini" sa makadaghan balikbalika. Unya tagoon sa usa ka sudlanan, hiposon sa aparador ug dili gastuhon hangtod sa pagsumad sa tuig silbing maoy pasaka.


Unya ang tanan mosulod sa pultahan sa balay ug mohunong duol sa pultahan diin anaa ang buongon nga nagbitay ug moingon: "Sama niining buongon kanunay unta nga puno ang among kaugalingon sa kaalam, kahibalo, gugma ug panagdait."


Pagkahuman, pakan-a ang imong binuhi nga mga mananap (kon duna) nga naa sa imong balay. Unya moduol na sa lamesa ang tanan. Ang matag usa maggunit sa usa ka ubas ug moingon: "Kining ubas simbolo sa katam-is sa panag-uban. Matagamtaman unta namo ang katam-is sa panaghiusa ug panagsinabtanay." Tubagon kini: Amen. Dayon kan-on ang ubas. Isunod ang itlog nga usa kabuok ug ang pansit nga diyotay.


Human og kaon sa tanan ang panapos nga pag-ampo: Kining tanan among gipangayo pinaagi sa Imong Anak nga si Jesukristo." Ang tanan motubag: Amen.


Makahimo ka na sa pagdugang og kaon kutob sa imong magustohan nga kan-on. Apan dili hikalimtan ang pagsimba niaanang adlawa. Labing maayo nga dili mogasto sulod sa maong adlaw. Amdamon daan ang tanan panginahanlan nianang adlawa kay basin duna kay bisita. Pun-a ang mga sudlanan sa tubig. Ang bugas daghan pa sa sudlanan ug ang gas sa imong stove o LPG igo pa. Timan-i nga dili mag-ihaw ug manok kay nagsimbolo kini sa kakha-tuka.
MAAYONG PASKO KAPAMILYA!
GIKAN SA SUGBUANON NA NI
KA AHMED, AMBA JESS, ATTY. SITOY,
KA ROGER, KA BINO

Dayon sa Sugbuanon Na Ni Blog!













Ang Sugbuanon Na Ni!, nga mabati sa DYAB Abante Bisaya matag Dominggo, alas 4-6 sa hapon, usa ka hinugpong nga paningkamot sa mga tagduma sa ABS-CBN Cebu, pinaagi ni Area Manager Tata Cinco-Sy, ug sa mga pundok nga nagpakabana pagtikad sa Dilang Bisaya nga gipangulohan sa Lubas sa Dagang Bisaya (LUDABI) nga ubos sa pagduma ni Atty. Adelino Sitoy. Makita sa hulagway ang mga tagduma sa tulomanon nga sila si Ahmed Cuizon (ikaduha gikan sa tuo), Roger Pono (tuo) ug Bino Guerrero (wala) uban ni DYAB Manager Leo Lastimosa (ikatulo gikan sa tuo).